Demokratska partija socijalista (DPS) bi se brzo vratila na vlast u Crnoj Gori kad bi vodeću funkciju u ovoj partiji preuzeo Nikola Janović, smatra urednik Portala BiznisCG Predrag Zečević.
“Janović je jedini priznao greške DPS-a i ne libi se da kaže da nekim viđenijim članovima DPS-a tu jednostavno nije mjesto. On je pošten i čestit čovjek, spreman je da se obračuna sa kriminalom. Ima dobar bekraund jer je “zlatna ajkula” “, kazao je Zečević u emisiji “Minula neđelja” na Aplus televiziji.
Prema Zečevićevim riječima, za DPS bi najbolja solucija bila da mladi članovi podignu revoluciju unutrar partije i odreknu se “junaka Skaj aplikacije” i “kokainskog kartela”.
“Ako to ne urade, od DPS-a nema ništa. A Janović je jako svjestan tog trenutka i kad bi on preuzeo vodeću funkciju, već u sljedećem izbornom ciklusu DPS bi se vratila na vlast. Ukoliko bi se desilo da vodeću funkciju preuzme neko ko je pod kontrolom bivšeg predsjednika Mila Đukanovića, to bi bilo samo poniranje DPS-a”, kazao je Zečević.
Podsjetimo, Janović je tokom gostovanja na A plus televiziji ranije kazao da DPS treba da mijenja pristup u razmišljanju i u retorici kako bi bili što jača partija.
