Tijela najmanje 46 ljudi, među kojima su i djeca, pronađena su u napuštenoj prikolici u blizini San Antonija u ponedjeljak.
Vjeruje se da je reč o migrantima, navodi CNN, prenosi Nova.rs.
Policija je pozvana oko 18 časova po lokalnom vremenu, nakon što je radnik u obližnjoj zgradi čuo vapaj za pomoć, rekao je šef policije San Antonija Bil Mekmanus na konferenciji za novinare u ponedjeljak uveče.
“Radnik je pronašao prikolicu sa djelimično otvorenim vratima i vidio je više ljudi mrtvih unutra”, rekao je Mekmanus.
U prikolici je pronađeno i 16 živih osoba, među kojima je i četvoro djece. Oni su prebačeni u obližnje medicinske ustanove na dalju njegu, rekao je šef vatrogasne službe San Antonija Čarls Hud. Dodao je da su preživjeli bili “vrući na dodir i patili su od toplotnog udara i iscrpljenosti”, ali su bili pri svijesti kada su prevezeni na bolničko liječenje.
U prikolici nije bilo tragova vode i nije bilo vidljive klime, iako su u oblasti San Antonija temperature vrlo visoke.
Tri osobe su u policijskom pritvoru, rekao je Mekmanus, ali nije jasno da li su oni povezani sa situacijom.
“Ne bi trebalo da otvaramo kamion i vidimo hrpe tijela unutra. Niko od nas ne dolazi na posao zamišljajući to”, rekao je šef vatrogasaca.
“To je tragično. Postoji bar 46 pojedinaca koji više nisu sa nama, koji su imali porodice, koji su vjerovatno pokušavali da nađu bolji život. A mi imamo 16 ljudi koji se bore za život u bolnici”, dodao je gradonačelnik Ron Nirenberg.
