Fudbaleri Australije pobijedili su danas selekciju Tunisa sa 1:0, u utakmici drugog kola Grupe D Svjetskog prvenstva u Kataru.
Jedini gol na na stadionu Al Džanub postigao je Mičel Djuk u 23. minutu.
Australija je tako osvojila prva tri boda na turniru, dok je Tunis je ostao na jednom osvojenom bodu.
Oba tima su loše počela utakmicu, bilo je dosta žustrih startova, nepovezanih dodavanja i preskakanja sredine terena, a prvi udarac ka golu viđen je u 21. minutu kada je Tunišanin Muhamed Drager šutirao sa distance.
Dva minuta kasnije Australija je povela. Krejg Gudvin je centrirao sa lijevog krila, a Djuk je sjajno skočio u kaznenom prostoru i savladao golmana Tunisa za vođstvo Australije.
Tunis je prvu veliku šansu imao u 41. minutu preko Dragera, a u samom finišu prvog poluvremena “zicer” nije iskoristio Jusef Msakni.
Tunis je ofanzivno krenuo u nastavku, ali nije uspio da opasnije zaprijeti sve do samog finiša meča kada je Vahbi Hazri šutirao sa šest – sedam metara, ali je Met Rajan bio na pravom mjestu i lako intervenisao. Na drugoj strani, ni Australija nije imala izrazite prilike, pa je meč riješen pogotkom Djuka iz prvog poluvremena.
U drugom meču ove grupe, kasnije danas sastaće se Francuska i Danska. Aktuelni svjetski šampioni imaju tri boda na svom kontu, dok Danska ima jedan.
Australija će u posljednjem kolu igrati protiv Danske, a Tunis protiv Francuske. Te utakmice su na programu 30. novembra.
