Trener Liverpula Jirgen Klop ističe da je plasman u finale Lige šampiona neka vrsta uspjeha i da ima osjećaj da će njegova ekipa i naredne sezone igrati u finalu, u Istanbulu.
“Ovog trenutka niko ne misli da je ovo bila sjajna sezona. Možda će nam za to trebati vremena. Osjećaj je drugačiji. Nije loše igrati u finalu. To je neka vrsta uspjeha, ne uspjeh koji želite. Imam jak osjećaj da ćemo se vratiti. Momci su takmičarski nastrojeni. Ovo je izvanredna grupa. Imaćemo izvanrednu grupu i naredne sezone. Gdje je finale sljedeće sezone? Istanbul? Rezervišite hotel”, rekao je Klop.
Fudbaleri Liverpula izgubili su u Parizu od Real Madrida sa 1:0 u finalu Lige šampiona.
“Igrali smo dobru utakmicu, ne savršenu. Mislim da savršena utakmica nije moguća protiv protivnika sa dubokom formacijom. Imali smo mnogo šuteva, ali ne najčistijih. Kurtoa je imao dvije odlične odbrane. Primili smo gol poslije ubacivanja, Valverde je želoo da šutira, Vinisijus je bio tamo i to je to”, naveo je njemački trener.
“Momci su sve pokušali, posebno kad su gubili, onda smo zaigrali kako smo željeli da igramo. Naši vezni igrači su bili preduboko, to je prijetnja kod kontranapada. Željeli smo da budemo hrabriji u drugom poluvremenu. To smo rekli u poluvremenu. Igrali smo oko njih, trebalo je da igramo više u formaciji a onda oko njih”, dodao je Klop.
Liverpul se ove sezone borio za četiri trofeja, a osvojio je dva domaća – FA kup i Liga kup. Titulu u Premijer ligi osvojio je Mančester siti.
