Osumnjičeni povezani sa terorizmom putuju u EU koristeći usluge kriminalnih mreža za krijumčarenje migranata. Te rute uključuju istočnu Mediteransku ruta, ulazak u Grčku iz Turske, te dalje putovanja preko Zapadnog Balkana u EU, navedeno je u izvještaju Europola o terorizmu 2022. godine, prenosi portal RTCG. Kako se ističe, osumnjičeni za terorizam ili nasilni ekstremisti, uključujući pojedince koji se vraćaju sa ratišta, koriste lažne dokumente dobijene od kriminalnih struktura da putuju u ili kroz EU.
Navodi se da je u 2021.godini Europolu prijavljen samo jedan nasilni incident potencijalno povezan sa džihadizmom na Zapadnom Balkanu. Pojašnjava se da je jedan albanski državljanin uhapšen pod optužbom za terorizam, nakon što je izbo pet osoba u džamiji u Tirani. U toku suđenja počinilac je raspoređen u psihijatrijsku bolnicu.
“Metode koje se koriste za radikalizaciju ili regrutovanje sljedbenika u regionu odražavaju složen politički scenario u zemljama Zapadnog Balkana, gdje su pitanja koja se tiču etničkog i vjerskog identiteta kombinovana sa ekonomskim i društvenim poteškoćama”, piše u izvještaju Europola koji je objavljen na njihivom zvaničnom sajtu.
Radikalizovane i ekstremističke grupe u regionu su, kako se navodi, obično male, labavo organizovane i vođene od pojedinaca koje su članovi grupe prihvatili kao vjerske autoritete.
“Prema ocjeni zemalja Zapadnog Balkana, salafističke grupe i pojedinci koji se zalažu za ultrakonzervativna i ekstremistička tumačenja islama ostali su glavni pokretači radikalizacije u regionu. U salafističkim zajednicama primijećeno je da propovjednici aktivni u ‘paralelnim džamijama’ i na neformalnim okupljanjima promovišu nasilje, dok su povratnici iz Sirije i drugih konfliktnih područja nastavili da šire džihadističke ideologije”, naglasili su iz Europola.
Nekoliko zemalja Zapadnog Balkana, navedeno je, potvrdilo je trend uočen prethodnih godina da se neke ekstremističke grupe predstavljaju kao nevladine organizacije (NVO) koje rade u humanitarne svrhe.
“Na ovoj poziciji prikupljaju donacije koje se zatim usmjeravaju prema pristalicama ili simpatizerima radikalnih islamističkih ideologija. U nekim slučajevima, ove grupe su uspostavile veze sa migrantskim zajednicama koje potiču sa Zapadnog Balkana u zemljama EU. Nekoliko osumnjičenih se 2021.godine vratilo iz konfliktnih područja u zemlje zapadnog Balkana”, konstatovano je u izvještaju Europola.
