Na zelenoj pijaci u TC “Gintaš” u Podgorici pojeftinio je mladi krompir, pa se on sada može kupiti za 1,20 i 1,30 eura, piše Dan.
Stari i dalje drži cijenu te ga prodavci nude za euro. Tri eura košta kilogram paradajza, dok je krastavac 1,50 eura. Paprike, u zavisnosti od sorte mogu se kupiti od 2,50 do 3,50 eura. Crni luk je od 1,50 dva, domaći bijeli pet, a vezica mladog luka košta 50 centi. Tikvice se mogu kupiti od euro do 1,50, dok je bijeli kupus euro. Prodavci boraniju prodaju četiri i pet eura, a raštan 2,50, dok je blitva 1,50, a salata 50 centi skuplja.
Pojeftinile su i trešnje, pa je za kilogram ovog voća sada potrebno izdvojiti četiri eura. Jagode se mogu naći za tri i pet, dok su banane od euro do dva.
Kivi košta 3,50, a pomorandže su euro jeftinije. Jabuke se mogu kupiti od 0,70 do 2,50, a kruške četiri eura. Za kilogram limuna potrebno je izdvojiti tri eura.
Lisnati sir 12 eura
Na sektoru mliječnih proizvoda za kilogram kučkog sira potrebno je izdvojiti deset eura, dok je pljevaljski euro jeftiniji. Lisnati sir košta 12, a mladi od 6,50 do sedam eura. Za kilogram kajmaka potrebno je izdvojiti 15 eura. Prodavci u ponudi imaju i maslo koje cijene 20 eura.
Na sektoru jaja cijene su od 23 do 45 centi.
